बोडेया पलेस्वां पुखू सार्वजनिक जूगु फैसला

साभार : नेपालभाषा टाइम्स, ११३८ तछलागा सप्तमी

थिमि – ख्वप जिल्ला अदालतं थनया ८ वडाय् च्वंगु कमलपुखू (पलेस्वां पुखू) सार्वजनिक जूगु फैसला न्यंकूगु दु । अदालतं मध्यपुर थिमि नगरपालिका अन्तर्गत साविकया वडा नं. ८ य् बोडे क्षेत्रय् च्वंगु पुखू सार्वजनिक जूगु फैसला न्यंकूगु खः । अदालतया न्यायाधिश मातृकाप्रसाद मरासिनीया इजलासं वंगु असार १९ गते मगलवाः उगु ऐतिहासिक पुखू सार्वजनिक भोगचलन याये दइकथं फैसला न्यंकूगु खः ।

मध्यपुर थिमिस्थित बोडे नगर लिक्कसं लाःगु पुखूया जग्गायात कान्छी पोडेया नाामं पास यायेवं विवादय् लानाच्वंगु खः । सार्वजनिक पुखूया जग्गायात नं व्यक्तिया नामय् पास यायेवं तम्वःपिं स्थानीयवासीत उकिया विरोधय् तकं कुहां वःगु खः । विरोधय् कुहां वःपिं स्थानीयवासीतय्सं ¥याली पिथनेगु नापं धर्ना बीगु ज्या तकं याःगु खः ।

सार्वजनिक पुखूया जग्गायात व्यक्तिया नामय् पास यायेवं उगु पुखूया अस्तित्वयात हाकनं सार्वजनिक रुपं हे कायम यायेगु ल्याखं विरोधय् कुहां वयाच्वंपिं स्थानीय वासिन्दातय्सं ‘कमलपोखरी संरक्षण अभियान’ नामं अभियान हे न्ह्याकाः संघर्षय् कुहां वःगु खः । अदालतया फैसला लिपा बोडेया स्थानीयवासीत उत्साहित जूगु दु । वि.सं. २०३२ सालं निसें विवादय् लानाच्वंगु उगु पुखूया १५ रोपनी ९ आना क्षेत्रफलय् न्यना वनाच्वंगु खः ।